Aruhusiwa kufukua mwili wa mwanawe uliozikwa miaka 17 iliyopita

“KWA miaka 17, Stephen Ndung’u Mwaura aliendelea kulinda kipande cha ardhi huko Ruiru ambako mwanawe, John Mwaura, alizikwa mwaka wa 2009. Lakini mazingira ya eneo hilo yamebadilika sana kwani mahali ambapo hapo awali palikuwa shamba la kilimo, sasa pamezungukwa na mabohari, biashara na majengo ya kibiashara. Baba huyo alijikuta akikabiliwa na uamuzi mgumu: kuuza ardhi hiyo au kumuacha mwanawe mahali hapo milele. Mnamo Mei 7, 2026, Mahakama Kuu ya Thika ilimpa njia ya kutatua changamoto hiyo. Jaji Florence Muchemi alitoa uamuzi uliomruhusu Stephen kufukua mabaki ya mwanawe, John Mwaura Ndung’u, kutoka shamba la LR No. 13136/6 katika eneo la kaskazini mashariki mwa mji wa Ruiru na kuyazika upya katika ardhi mpya ya familia huko Nyandarua. Stakabadhi za mahakama zinaonyesha kuwa John Mwaura Ndung’u alifariki Januari 2, 2009, katika Nairobi Hospital alipokuwa akipokea matibabu. Alizikwa siku saba baadaye, Januari 9, 2009, katika ardhi iliyomilikiwa na babake huko Ruiru. Wakati huo, eneo hilo lilikuwa la kilimo lenye nafasi kubwa na lililoonekana kuwa mahali pazuri pa mapumziko ya milele. Hata hivyo, kadri miaka ilivyopita, Stephen alisajili ardhi hiyo chini ya kampuni ya Profile Development Limited, ambayo baadaye ilibadilisha jina kuwa Ndakafield Limited. Kilichobadilika zaidi ni kwamba maeneo yaliyokuwa yamezunguka ardhi hiyo yalibadilishwa kutoka matumizi ya kilimo hadi biashara na shughuli nyingine za kibiashara zilianza kujengwa karibu na kaburi la mwanawe. Akitoa ushahidi mahakamani, Stephen alisema wazi kwamba alitaka kuuza ardhi hiyo kwa matumizi ya kibiashara. “Lakini siwezi kuiuza wakati mabaki ya mwanangu bado yamezikwa hapo,” alimweleza jaji. Mahakama ilisema katika uamuzi wake kuwa alieleza kuwa angependa kuuza shamba hilo lakini hangeweza kufanya hivyo huku mwili wa mwanawe ukiwa bado umezikwa hapo. “Hivyo basi, anaomba aruhusiwe kufukua mabaki ya mwanawe ili ayazike katika ardhi yake huko South Kinangop, eneo ambalo yeye na watoto wake wametenga kuwa mahali pa kudumu pa mazishi ya familia,” alisema jaji. Mahakama ilibaini kuwa alikuwa ametimiza masharti yote ya sheria. “Ametoa ushahidi chini ya kiapo kwamba yeye ni baba mzazi wa marehemu na ameeleza sababu za kutaka kuhamisha mabaki ya mwanawe kutoka Ruiru hadi South Kinangop. Ameambatisha hati za umiliki wa mashamba yote mawili pamoja na cheti cha kifo cha marehemu. Kwa kuwa yeye ni baba mzazi na jamaa wa karibu zaidi wa marehemu, ametii masharti ya Kifungu cha 146 cha Sheria ya Afya ya Umma,” alisema Jaji Muchemi. Katika uamuzi wake, Jaji Muchemi aliamuru Afisa wa Afya ya Umma wa Kaunti Ndogo ya Ruiru kutoa kibali cha kufukua mabaki ya marehemu John Mwaura Ndung’u kutoka ardhi ya Ruiru. Mahakama pia iliamuru afisa huyo kusimamia shughuli ya kufukua mabaki hayo na kutoa kibali kingine cha kuyazika tena katika ardhi ya Nyandarua. Kamanda wa Polisi wa South Kinangop alielekezwa kutoa usalama wakati wa mazishi hayo. Kwa maagizo hayo yaliyotolewa kwa njia ya mtandao Mei 7, 2026, baba huyo alifuata sheria kuhakikisha mabaki ya mwanawe hayataachwa wala kusahaulika.

Summary generated from the RSS feed of Taifa Leo (Swahili). All article rights belong to the original publisher. Click through to read the full piece on taifaleo.nation.co.ke.