Ruto atangaza zawadi ya Sh40m kupigia debe nyumba nafuu na SHA

“WIKI chache zilizopita, alipokuwa akihutubia Wakenya wanaoishi Roma, Italia, Rais William Ruto alitoa onyo kali kuhusu matumizi ya mitandao ya kijamii. Alisema majukwaa hayo yamekuwa kama soko kelele nyingi ambapo ukweli na uongo huchanganyikana kwa urahisi, akiwataka Wakenya wanaoishi ughaibuni wasiamini kila taarifa wanayoiona mtandaoni bila kuthibitisha. Alionya kuwa kuna wimbi la taarifa potofu zinazoenezwa kimakusudi nchini kwa maslahi ya kisiasa na ubinafsi, akisisitiza umuhimu wa uhakiki wa taarifa. Katika hotuba hiyo, Rais aligeukia kile anachokiita mafanikio ya utawala wake katika kipindi cha miaka mitatu iliyopita, akilenga miradi miwili mikuu—Mamlaka ya Afya ya Jamii (SHA) na Mpango wa Nyumba Nafuu—ambayo imekuwa ikikosolewa na umma. Alisema zaidi ya Wakenya 30.6 milioni wamejisajili na SHA ndani ya miezi 18, ikilinganishwa na milioni nane waliokuwa chini ya NHIF kwa zaidi ya miaka 60. Aidha, alisema SHA inatarajiwa kulipa hospitali Sh13 bilioni kwa huduma za Machi 2026. Katika hatua mpya ya kuimarisha uungwaji mkono, Rais alihudhuria tuzo za Kalasha Film Awards akiwa rais wa kwanza tangu kuanzishwa kwa tuzo hizo miaka 15 iliyopita, akionyesha nia ya kutumia sekta ya ubunifu kufikisha ujumbe wake. Alitangaza mashindano ya filamu ya zawadi ya Sh40 milioni ili kuwatia motisha watayarishaji wa filamu na waundaji maudhui kuonyesha jinsi SHA na mpango wa nyumba nafuu umeathiri maisha ya Wakenya. Akizungumza kwa niaba yake, Mkuu wa Miradi Maalum na Uchumi wa Ubunifu Dennis Itumbi alisema washindi wanne watapokea Sh10 milioni kila mmoja—wawili kwa kazi bora kuhusu SHA na wawili kwa kazi bora kuhusu nyumba nafuu. Tume ya Filamu Kenya itasimamia mashindano hayo na inatarajiwa kutoa masharti rasmi hivi karibuni. Hata hivyo, hatua hii inajiri wakati takwimu kuhusu ajira katika sekta ya ujenzi zinapingana na madai ya serikali kuhusu mafanikio ya mpango wa nyumba nafuu. Kwa mujibu wa utafiti wa uchumi, jumla ya watu 728,400 walikuwa wakifanya kazi katika sekta ya ujenzi mwaka jana.

Summary generated from the RSS feed of Taifa Leo (Swahili). All article rights belong to the original publisher. Click through to read the full piece on taifaleo.nation.co.ke.