WALIOBOBEA: Itumbi, mwanablogu mashuhuri nchini

“MTAALAMU wa mawasiliano ya kidijitali, Dennis Itumbi ameibuka kuwa mmoja wa watu wenye ushawishi mkubwa zaidi katika siasa za kisasa nchini. Safari yake kutoka kuwa mtu wa kawaida hadi kuwa mmoja wa watu wa karibu katika duru za mamlaka imejengwa kupitia teknolojia, siasa, ubunifu na uwezo wa kusoma mwelekeo wa jamii ya kidijitali. Kwa sasa, Itumbi anahudumu kama Mkuu wa Miradi Maalum ya Rais na Uratibu wa Uchumi wa Ubunifu katika serikali ya Rais William Ruto. Pia, aliwahi kuapishwa kama Naibu Waziri mnamo Machi 2023 kabla ya mahakama kutangaza nafasi 51 za manaibu mawaziri kuwa kinyume cha katiba. Itumbi alianza kujijengea jina kupitia blogu na mitandao ya kijamii wakati ambapo viongozi wengi wa kisiasa nchini hawakuwa wametambua nguvu ya mawasiliano ya kidijitali. Akiwa kijana mwenye uwezo wa kutumia teknolojia kushawishi mjadala wa umma, alianza kujijengea wafuasi mtandaoni kupitia maoni yake kuhusu siasa na uongozi. Umaarufu wake uliongezeka zaidi wakati wa kesi za viongozi wa Kenya katika Mahakama ya Kimataifa Kuhusu Uhalifu (ICC) zilizokabili Uhuru Kenyatta na William Ruto katika Mahakama ya Hague. Itumbi anatambulika kama mmoja wa watu waliokuwa nyuma ya kampeni za kidijitali zilizolenga kubadilisha simulizi kuhusu viongozi hao kimataifa na nchini Kenya. Baadaye aliongoza mkakati wa mawasiliano wa kidijitali uliochangia ushindi wa Uhuru Kenyatta katika uchaguzi mkuu wa mwaka 2013. Wakati huo, alijijengea sifa kama mmoja wa watu waliokuwa wakielewa vyema matumizi ya Twitter, Facebook na blogu katika kushawishi maamuzi ya kisiasa. Katika uchaguzi mkuu wa mwaka 2022, Itumbi alionekana tena akiwa mstari wa mbele katika kampeni za Kenya Kwanza chini ya William Ruto. Alianzisha mtandao maarufu wa kidijitali uliokuwa ukijulikana kama Hustler Nation Intelligence Bureau (HNIB), ambao ulitumiwa sana kusambaza ujumbe wa kisiasa na kuwafikia vijana kupitia mitandao ya kijamii. Wachambuzi wa siasa wanaamini kuwa HNIB ilikuwa moja ya mikakati muhimu iliyosaidia kampeni za Ruto kushinda uchaguzi wa mwaka 2022. Kupitia jukwaa hilo, Itumbi na timu yake waliweza kudhibiti mijadala ya mtandaoni, kujibu wapinzani wa kisiasa na kusambaza ujumbe wa “hustler nation” kwa kasi kubwa. Hata hivyo, safari yake haijakosa misukosuko kwani kabla ya uchaguzi wa mwaka 2022, Itumbi aliingia katika mgogoro mkubwa wa kisiasa na utawala wa Rais Uhuru Kenyatta. Wakati huo, alidai kutekwa nyara na maafisa wa usalama waliokuwa wakihusishwa na aliyekuwa Waziri wa Usalama wa Ndani, Fred Matiang'i tukio lililozua mjadala mkubwa kuhusu siasa na matumizi ya vyombo vya usalama nchini. Aidha, aliyekuwa Naibu Rais, Rigathi Gachagua aliwahi kumshutumu Itumbi kwa kutengeneza picha za mzaha (memes) zilizomuonyesha kana kwamba alikuwa ametengwa wakati wa ziara ya Mfalme wa Uingereza nchini Kenya. Ripoti zilidai kuwa Gachagua alimkabili Itumbi kutokana na mvutano huo. Licha ya mabishano hayo, Itumbi ameendelea kubaki mtu mwenye ushawishi mkubwa katika siasa za Kenya. Safari ya Dennis Itumbi inaonyesha namna siasa za Kenya zimebadilika kutoka mikutano ya hadhara hadi vita mtandaoni. Kutoka kuwa mwanablogu wa kawaida hadi kuwa mmoja wa washauri wenye nguvu karibu na mamlaka, ameonyesha jinsi teknolojia zinaweza kumbadilisha mtu kuwa mhusika mkubwa katika siasa za taifa. Kwa wafuasi wake, Itumbi ni mbunifu aliyesaidia kubadilisha mawasiliano ya kisiasa nchini. Kwa wakosoaji wake, yeye ni sura ya propaganda za kisasa za mtandaoni. Lakini kwa vyovyote vile, jina lake limeendelea kubaki katikati ya siasa za Kenya kwa zaidi ya muongo mmoja.

Summary generated from the RSS feed of Taifa Leo (Swahili). All article rights belong to the original publisher. Click through to read the full piece on taifaleo.nation.co.ke.